ETN və MÜTDA-nın yeni xaosu: TƏHSİL Hicablı müəllim və şagirdlərə qarşı

Azərbaycan təhsil sistemində son günlər müşahidə olunan gərginlik, məktəblərdə hicablı müəllim və şagirdlərə qarşı tətbiq olunan məhdudiyyətlər cəmiyyətdə ciddi narazılıq dalğası yaradıb. ETN və MÜTDA adı altında aparılan bu siyasət, sadəcə bir inzibati qərar deyil, vətəndaşların vicdan və təhsil hüququna birbaşa müdaxilə kimi qiymətləndirilir.

Tehsil.media qeyd edir ki, ​təhsilin əsas məqsədi cəmiyyəti maarifləndirmək və intellektual gələcək formalaşdırmaqdır. Lakin nazirliyin bu addımı təhsil ocaqlarını bilik meydanından ideoloji basqı mərkəzinə çevirib. Direktorlara göndərilən göstərişlər, regional təhsil idarələrinin təzyiqləri müəllim və şagirdləri çıxılmaz vəziyyətdə qoyur. Bir tərəfdən öz şəxsi əqidəsinə sadiq qalan vətəndaşlar, digər tərəfdən isə nazirliyin "yuxarıdan gələn" əmrlərini yerinə yetirməyə məcbur edilən, lakin əslində bu qərardan narazı olan direktorlar. Elm və Təhsil Nazirliyi bu prosesdə birbaşa məsuliyyəti daşıyır; çünki bu qərar təhsilin keyfiyyətini yüksəltmək deyil, cəmiyyətin mənəvi dəyərləri ilə konflikt yaratmaq funksiyasını daşıyır.

​"Din dövlətdən ayrıdır" prinsipi Azərbaycan Konstitusiyasının təməl daşlarından biridir və bu prinsip dövlətin bütün dinlərə bərabər məsafədə olmasını nəzərdə tutur. Lakin nazirliyin atdığı addımlar dini azadlıqların qorunması deyil, məhz müəyyən bir qrupa qarşı diskriminasiya xarakteri daşıyır. Multikulturalizm və tolerantlıq ilə fəxr edən bir dövlətdə məktəblərin hicablı şagird və müəllimlər üçün "qadağalı zona"ya çevrilməsi, ölkənin beynəlxalq imicinə və daxili sosial sabitliyinə vurulan zərbədir. Nazir bu qərarı ilə cəmiyyəti iki cəbhəyə bölür və təhsil mühitini dinc öyrənmə məkanı olmaqdan çıxarır.

Tehsilmedia.az bildirir ki, ​direktorların və müəllimlərin sıxışdırılması - hazırda məktəb rəhbərləri, özü də məmnun olmadıqları bir prosesin icraçısı kimi cəmiyyətin hədəfinə çevrilirlər. Sosial şəbəkələrdə yayılan və izləyicilərin qəzəbinə səbəb olan görüntülər, təhsil sistemindəki idarəetmə böhranının göstəricisidir. Nazirlik öz siyasi ambisiyalarını və ya tələblərini həyata keçirmək üçün direktorları "zərbə altında" qoyur. Müəllimlər isə tədris prosesinə fokuslanmaq əvəzinə, geyim tərzi üzərindən aparılan bu yersiz mübahisələrin qurbanı olurlar.

​ETN və MÜTDA bu mövqeyi ciddi ictimai etirazlara zəmin hazırlayır. Təhsil sistemindəki köklü problemləri (maddi-texniki baza, müəllimlərin sosial vəziyyəti, keyfiyyət məsələləri) həll etmək əvəzinə, məcburi geyim forması və ya məhdudiyyətlərlə məşğul olmaq uğursuz bir idarəetmə nümunəsidir. Nazir anlamalıdır ki, təhsil ocaqlarında hər hansı bir qrupu sıxışdırmaqla müasir təhsil qurmaq olmaz. Əksinə, bu cür süni gərginliklər cəmiyyətdəki inamı sarsıdır və qarşıdurmanı dərinləşdirir. Əgər bu siyasət dərhal dayandırılmazsa, gələcəkdə daha böyük narazılıqların və etirazların məsuliyyəti birbaşa nazirliyin üzərində qalacaq.