İddia: Nazim adlı iş adamı Arzu Kazımovun ofisində qalmaqal yaradıb

Azərbaycanda sahibkarlığın inkişafı dövlət siyasətinin prioritet istiqamətlərindən biridir. Ölkədə biznes mühitinin yaxşılaşdırılması, sahibkarlara dəstək göstərilməsi və investisiyaların təşviqi məqsədilə ardıcıl islahatlar həyata keçirilir. Məqsəd sağlam rəqabət mühitinin formalaşdırılması, iqtisadi inkişafın sürətləndirilməsi və yeni iş yerlərinin yaradılmasıdır.


Bununla yanaşı, bəzən sahibkarlar arasında yaranan mübahisələrin hüquqi müstəvidə deyil, başqa üsullarla həll edilməsinə cəhd göstərildiyi barədə məlumatlar da ictimaiyyətə çatdırılır.

Bakunews.tv-yə daxil olan məlumata görə, bir neçə gün əvvəl tanınmış iş adamı və müxtəlif tikinti layihələrinin icrasında iştirak etmiş Arzu Kazımovun ofisində insident baş verib.

Redaksiyamıza təqdim edilən məlumata əsasən, adı Nazim kimi göstərilən şəxs Arzu Kazımovun ofisinə gələrək tərəflər arasında yaranmış mübahisə fonunda qarşı tərəfə təzyiq göstərməyə çalışıb. İddia olunur ki, hadisə zamanı ofisdə əmlaka ziyan dəyib, otaqlarda dağıntılar yaranıb və əməkdaşlar gərgin vəziyyətlə üzləşiblər.

Şikayətçi tərəf hesab edir ki, mövcud mübahisə hüquqi müstəvidə həll edilməli olduğu halda, qarşı tərəf məsələyə zor tətbiq etməklə yanaşmağa cəhd göstərib. Səsləndirilən iddiaların hüquq-mühafizə orqanları tərəfindən araşdırılacağı gözlənilir.

Qeyd edək ki, redaksiyamıza təqdim olunan məlumatlarda adı yalnız Nazim kimi qeyd edilən şəxsin tam kimliyi, soyadı və əlaqə vasitələri göstərilmədiyindən onunla əlaqə saxlamaq və irəli sürülən iddialara münasibətini öyrənmək mümkün olmayıb. Şikayətçi tərəfin kimliyi redaksiyaya məlum olsa da, qarşı tərəfin tam identifikasiya edilməməsi səbəbindən onun mövqeyini almaq mümkün olmayıb.

Bakunews.tv olaraq bildiririk ki, yazıda yer alan məlumatlar şikayətçi tərəfin təqdim etdiyi məlumatlara əsaslanır və bu iddiaların hüquqi qiymətləndirilməsi aidiyyəti dövlət orqanlarının səlahiyyətinə daxildir.

Redaksiyamız qarşı tərəfin mövqeyini dərc etməyə hazırdır. Nazim adlı şəxsin və ya onun səlahiyyətli nümayəndəsinin açıqlaması daxil olduğu təqdirdə, həmin mövqe heç bir dəyişiklik edilmədən və operativ şəkildə ictimaiyyətə təqdim olunacaq.

Məsələ ilə bağlı rəsmi açıqlamalar olduğu təqdirdə oxucularımıza əlavə məlumat verəcəyik.